Estadu Falladu: Inserteza ou Impassé Polítika ne’ebé Timor-Leste enfrenta la sufisienti atu karakteriza Timor-Leste nu’udar estadu falladu – Failed State

Estadu Falladu:  Inserteza ou Impassé Polítika ne’ebé Timor-Leste enfrenta la sufisienti atu karakteriza Timor-Leste nu’udar estadu falladu – Failed State

Krize, impassé no Inserteza Polítika ne’ebé Timor oan hasoru dezde 2017 to’o ohin loron provoka analista independent, Polítiku no mos jornalista balu iha rai laran karakteriza Timor-Leste nu’udar “Estadu Falladu”; ka “Failed State” iha dalen Inglesh. Balu tan karakteriza situasaun atuál hanesan “Estadu Anarkizmu.” Termus  sira ne’e uza atu sistematiza, no rasionaliza evolusaun Polítika rai laran. Atributu Estadu Falladu ba Timor la’os buat foun. Maski nune’e, kritiku tebes atu ke’e kle’an no kritiku konseitu sira ne’e no ninia implikasaun ba rasionalizasaun no sistematizasaun kondisaun atuál.

Komesa hosi Polítiku sira ne’ebé tur iha Governu to’o sidadaun sira iha area rural konsente ho krize Polítika ne’ebé Timor-Leste enfrenta hela. Krize ida ne’e mos dala barak refere hanesan impassé no balu fali hanaran inserteza. Karakterizasaun sira ne’e refere ba sekuensia Polítika ne’ebé akontese dezde 2017 mai leten; komesa hosi formasaun Governu minoria hosi Partidu Fretilin; desizaun Prezidenti nian lori bolu eleisaun antisipada, desizaun Prezidenti nian lori la fo pose ba membru Governu nian hosi Conselho Nacional da Reconstrusaun de Timor-Leste (CNRT), xumba iha Orsamentu Jeral du Estadu 2020 nian, koligasaun AMP rahun, no ikus liu mak mudansa iha meja Parlamentu nian. To’o agora, seidauk iha ema ida mak serteza kona ba finalidade hosi evolusaun Polítika ida ne’e.

Komenta kona-ba dezenvolvimentu ida ne’e, Polítiku no analista balu karakteriza Timor-Leste nuudar estadu ne’ebé falla ona. Fundamentu hosi argumentu ida ne’e mak konstituisaun; liga ho distrbuisaun poder entre orgaun soberanu sira no iha violasaun konstituisaun.

Karakterizasaun Timor-Leste nuudar Estadu Falladu la’os foun iha ita nia istoria tinan 18 nuudar estadu soberanu ida. Dezde inisiu kedan, akademista, no jornalista karakteriza Timor-Leste nuudar projetu harii nasaun no estadu hosi komunidade internasionál liu hosi ONU ne’ebé falla. Ezemplu iha komentariu ne’ebé publika iha Foreign Affairs iha 2014, Madhu Narasimhan karakteriza Timor-Leste nuudar “The World’s Youngest Failed State.” Fundamentu hosi argumentu ida ne’e mak dezafiu dezenvolvimentu ekonomia ne’ebé Timor-Leste enfrenta no ninia estatutu iha rejiaun Sudeste Aziatiku. Damien Kingsbury, Profesor iha  Deakin University fo hanoin katak iha ameasa boot Timor-Leste atu sai estadu post-colonial ne’ebé falla “Post-Colonial Failed State.” Argumentu ida ne’e bazeia ba ninia analiza ba krize 2006. Tuir nia, krize refere integrasaun nasionál. Ezemplu rua ne’e atu hatudu deit katak karakterizasaun Timor-Leste nuudar Failed State la’os foun.

Iha nivel internasionál, konseitu Failed State relativamente nuudar konseitu foun; komesa mosu iha sekulu vinte nia rohan. Akademista sira refere ba artigu “Saving Failed State”, hosi Gerard B. Helman no Steven R. Ratner, publika iha Foreign Policy nuudar orijin hosi konseitu Failed State. Termus ne’e atu refere ba krize, violensia no funu sivil ne’ebé mosu iha Yugoslavia, Somalia, Sudan, Liberia no Cambodia. Iha kazu hirak ne’e, estadu laiha kapasidade atu sustenta nia an; rezulta disobidensia sivil, governu la funsiona, krize ekonomia, violensia, refujiadu no Guerra sivil. Importante atu nota katak artigu ida ne’e laos karakterizasaun deit kona ba situasaun real, maibe bolu atensaun komunidade internasionál, partikularmente Organizasaun Nasoens Unidas (ONU) atu intervene bazeia ba razaun umanitaria. Autor seluk ne’ebé influensiadu iha area ne’e mak William Zartman ho konseitu Collapsed State; refere ba estadu ne’ebé labele dezempenha ninia funsaun baziku. Ohin loron, Failed State refere ba estadu ne’ebé labele dezempenha ninia funsaun iha aspetu oioin; hanesan seguransa, governasaun, kontrola violensia, divizaun Polítika, no intervensaun esterna.

Konseitu seluk ne’ebé la’o hamutuk no uza troka malu iha siklu dezenvolvimentu internasionál mak Estadu Frajil ka Fragile State. Estadu Frajil importante iha siklu dezenvolvimentu internasionál tanba populasaun barak iha pais sira ne’e mak moris iha kondisaun pobreza, governasaun la efikaz, risku ba krize no violensia, no sai hanesan ameasa ba estabilidade internasionál. Timor-Leste rasik prefere ba Estadu Frajil, evidenti iha ninia involvimentu ativu iha kriasaun grupu g7+ no kontinua ativu iha grupu ne’e.  Iha diskusaun sira iha nivel internasionál, estadu frajil refere ba estadu ne’ebé ninia kapasidade no lejitimidade fraku; haree hosi konflitu no funu, governasaun ne’ebé la efikaz, no krize Polítika no ekonomia ba tempu naruk. Estadu frajil la mai hosi dixiplina siensia Polítika, maibe barak liu hosi dezenvolvimentu internasionál.

Konseitu rua ne’e maski uza ba mai, maibe iha implikasaun diferenti. Failed State barak liu nia implikasaun ba intervensaun komunidade internasionál nian bazeia ba razaun umanitaria. Estadu Frajil, maski rekonhese iha dezafiu iha dezenvolvimentu, maibe bolu atensaun komunidade internasionál atu koopera no ajuda lori resolve problema sira ne’e. Estadu frajil rekonhese existensia instituisaun estadu nian no kooperasaun internasionál liu hosi ajudus – Aid – hanesan instrumentu atu resolve. Estadu falladu pelu kontrariu bolu komunidade internasionál atu halo intervensaun tanba foti pozisaun ida katak instituisaun estadu falla ona atu proteze sidadaun sira.

Atensaun kona-ba estadu falladu no estadu frajil iha diskursu sira iha nivel internasionál indika mudansa importante ida kona ba papel estadu rasik iha prosesu dezenvolvimentu. Ida ne’e importante tebes tanba dezde 1970 e tal, mosu perspesaun ida katak prezensa estadu la importante iha ekonomia no dezenvolvimentu internasionál. Diminisaun papel estadu la’o hamutuk ho aproximasaun neo-liberal nian iha dezenvolvimentu, iha ne’ebé merkadu livre mak dalan diak liu atu atinzi kreximentu ekonomiku, efisiensia ekonomiku no distribuisaun rekursu. Maibe dezde 1990 – etal, ho krize oioin ne’ebé mosu, no disintegrasaun nasionál ne’ebé mosu iha fatin fatin, estadu sai fali sentru ba atensaun iha estadu dezenvolvimentu. Tuir relatoriu World Development Report 1997 nian, atensaun ba papel estadu kauza hosi ne’e mak krize ne’ebé mosu iha Eropa Oeste no disintegrasaun Uniaun Sovietika, krize dezenvolvimentu iha pais industrializadu sira, papel importante estadu iha industrializasaun iha Azia Leste no mos krize umanitaria iha fatin fatin tanba disintegrasaun nasionál. Tanba ne’e, pergunta la’os ona kona ba presiza ka lae estadu; maibe efikasia hosi instituisaun estadu rasik atu asumi ninia knaar iha sosiedade; partikularmente atu orienta no diriji dezenvolvimentu.

Problema prinxipal ne’ebé autor nota hosi aplikasaun konseitu ne’e iha kontextu Timor mak tendensia atu obriga konseitu ne’e iha realidade ida ne’ebé diferenti tebes. Estadu falladu so bele justifika iha kontextu ida ne’ebé Governu la funsiona, administrasau publiku rahun, provizaun ba servisu publiku sira la existe ona no iha krize umanitaria grave, no estadu laiha ona kapasidade atu proteze sidadaun sira. Ida ne’e sai baze ba intervensaun internasionál. Kondisaun hirak ne’e la’os kondisaun ne’ebé Timor iha. Timor-Leste enfrenta duni krize Polítika ne’ebé la’o dezde 2017 mai, ne’ebé rezulta ba resesaun ekonomia. Maibe tenki rekonhese katak iha 2018 ekonomia iha indikasaun atu normaliza maski la rekopera, iha 2019 ekonomia komesa rekopera. Tuir tan, instituisaun estadu sei funsiona, administrasaun publiku sei funsiona, provizaun servisu iha setor saude no edukasaun sei funsiona, maski hasoru dezafiu em termus de kualidade. Iha duni persepsaun kona ba inseguransa, iha krime,  maibe krime sira ne’e la to’o nivel ida ne’ebé sai ameasa ba disintegrasaun nasionál.

Krize Polítika ne’ebé lori too Timor-Leste enfrenta la sufisiente atu justifika katak estadu falla. Hosi pontu de vista autor nian, krize no inserteza Polítika, krize ekonomia, problema iha governasaun, no problema oioin ne’ebé Timor-Leste enfrenta nuudar parte hosi prosesu harii estadu no nasaun – Nation-State Building. Invez de trata krize ida ne’e hanesan finalidade hosi prosesu ida ne’ebé falla, hau prefere atu trata krize ida ne’e ho atitude pozitivu lori haree katak krize ida ne’e revela no fo sai problema estrutural lubuk ida; ligadu ho sistema semi-prezidensialista, lakuna oioin iha konstituisaun ne’ebé loke ba interpretasaun oioin; kapasidade elite Polítiku sira atu jere sira nia interese Polítiku no ekonomia tuir normas no prinxipiu demokratiku, frakeza iha administrasaun publiku, ekonomia ne’ebé depende ba despeza publiku, no kestaun Polítika ekonomia. Ba oin opsaun iha Timor oan nia liman. Invez de haree ne’e hanesan impedimentu ba futuru, Timor oan tenki aten brani atu foti krize ida ne’e hanesan lisaun importante ida iha prosesu harii nasaun no estadu. No Importante liu atu toma katak prosesu harii estadu no nasaun laiha ninia rohan; no krize ida ne’e hola parte iha prosesu aprendizazem ida no teste ida ba demokrasia.

Autor