Estadu Emerzensia: Programa Eskola Ba Uma La Efetivu

Estadu Emerzensia: Programa Eskola Ba Uma La Efetivu

Hafoin Governu Timor-Leste deklara Estadu Emerzensia hodi hatan ba pandemia Virus Korona (COVID19), Ministeriu Edukasaun Juventude no Desportu (MEJD) anunsia hodi hapara temporariamente prosesu aprendezajen iha eskola sira.   Liu tiha fulan ida, iha Abril 2020, MEJD introdus programa Eskola Ba Uma liu hosi kanal televizaun, haruka mensazen ba telemovel konaba materia no leitura ba disiplina aprendezajen nian hodi estudante sira estuda iha uma no mos liu hosi plataforma elekroniku eh kunesidu ho naran Online.

Mosu komentariu oioin hodi hatan ba inisiativa MEJD ne’e. Komentariu balun iha media sosial kritika MEJD tan introdusaun programa Eskola Ba Uma la haree realidade katak, populasaun hotu-hotu la asesu ba Radio no Televizaun, MEJD seidauk distribui livru sir aba eskola hotu-hotu no rede internet la kobre teritoriu Timor-Leste tomak.

Iha fulan Maiu, Komisaun G, Parlamentu Nasional halo fiskalizasaun ba Munisipiu hirak hodi observa sekarik programa Eskola Ba Uma lao duni ka lae.  Deputadu sira hetan informasaun katak, programa Eskola Ba Uma la funsiona hanesan MEJD nia hakarak tan fasilidade no infrastrutura sira la iha.

TALITAKUM, halo kobertura hodi verifika komentariu sira ne’ebe mak mosu ona iha media sosial no mos rezultadu fiskalizasaun Parlamentu Nasional nian.

Estudante finalista husi Eskola Sekundaria Cristal,  Cecilia da Piedade, hato’o nia desatisfasaun katak “ Durante eskola online hau neim aprende buat barak, dala ruma hau konfuzaun atu husu maibé husu oinsá, tamba ne’e  hau la satisfaz ba prosesu aprendizajen liu husi online nomós akompaña direita husi televizaun .”

Sentimentu hanesan, hato’o mos hosi Angelo Sarmento Soares dos Santos, estudante Eskola Sekundaria 4 Setembru UNAMET, Dili, katak nia mos la satisfas ho metudu Eskola Ba Uma. Angelo Sarmeto Soares Dos Santos  hatete:” Durante ami la ba eskola ka estuda online,  ami mós laiha komunikasaun  ho  ami nia professor sira konaba prosesu aprendezajen.”

Maske nune’e, Cecilia ho nia kolega sira halo esforsu rasik hodi kontaktu professor sira liu hosi WhatsApp Group hodi sira halo diskusaun konaba materia aprendezajen sira. Meius ida ne’e, hatuir Cecilia dalaruma hetan orientasaun diak-liu hosi professor sira iha aspeitu aprendezajen sira, hanesan halo traballu no mos rezumu sira hosi leitura sira. 

Profesor Bernadino Soares, hosi Eskila Sekundaria 4 Setembru UNAMET, Dili apresia inisitiva estudante sira hodi kria WhatsApp Group hodi fahe material no hetan esplikasaun hosi professor sira. Bernadino Soares hatete katak “ …Estudante sira iha insitiva hodi estabelese grupu whatssap hodi involve mos hau no hau fahe (material), inklui mos esplikasaun no respostas ba estudante sira nia prekupasaun.

Nune’e mos Profesor Bernadino Soares hatete katak durante Estadu Emerzensia, estudante balun fila tiha ba sira nia knua ne’ebe laiha asesu ba rede internet no mos estudante sira barak mak laiha telemovel android, laptop no mos barak mak laiha osan hodi sosa pulsa. Problema sira ne’e hotu tuir Bernadino Soares,  difikulta tebes procesu aprendizajen liu hosi programa Eskola Ba Uma ka Eskola Online. Tuir Bernadino Soares, programa ne’e  la efetivu.

Maske nune’e, Cecilia mos infrenta difikuldade atu kontinua prosesu aprendezajen liu hosi internet tan rekere nia atu sosa pakote internet. Cecilia hatete katak  nia Inan no Aman ne’ebe halo negosio kiik, iha periodu Estadu Emerzensia la hetan rendementu normal.  

Situasan sira ne’ebe mak professor no estudante sira infrenta iha Dili, akontees mos iha Munisipiu Lautem. Koordenador Ensinu Básiku 1.2 Filial Vaniria – Lautém, ne’ebe TALITAKUM kontaktu hosi telemovel hatete katak durante periodu Estadu Emerzensia eskola provizoriamente taka. Estudante sira ne’ebe mak iha asesu ba rede internet no televizaun bele akompana prosesu aprendezajen liu hosi programa Eskola ba Uma.   Maske nune’e, Koordenador Ensino Baziku 1.2 Fillial Vaniria, hatete katak  dezafiu ne’ebé nia observa  mak estudante  sira la asesu programa Eskola Ba Uma tamba laiha televizaun, laiha radio, laiha telfone android no eletrisdade  la funsiona normal.   Asuntu sira ne’e halo estudante sira la konsege akompaña programa ida ne’e ho diak , liu-liu ba estudante sira iha area remota sira.

Sentimentu triste mos estudante no professor sira espresa tan durante periodu Estadu Emerzensia, eskola sira la konsege organiza izame trimestral da-uluk nian ne’ebe monu iha fulan Abril. Cecilia Piedade haktuir katak, realizasaun izame trimestral ne’e importante atu tulun estudante finalista nia notas iha izame nasional. Cecilia Piedade suzere atu MEJD bele realiza hikas izame trimestral da-uluk nian hafoin Estadu Emerzensia remata ona no mos suzere se karik MEJD la konsege halo izame trimestral, husu atu professor fo traballu ba estudante sira hodi halo rezumu ba materia aprendezajen sira.

Hafoin rona tiha komentariu hosi estudante sira, TALITAKUM koalia mos ho Profesora Joana Fatima, hosi Eskola Sekundaria 4 Setembru UNAMET ne’ebe afirma katak durante Estadu Emergensia prosesu aprendezajen iha eskola totalmente paradu tan eskola refere la hetan orientasaun hosi MEJD.

Konaba izame trimestral Da-uluk ne’ebe mak la konsege hala’o, Profesora Joana Fatima hatete katak professor sira hetan ona orientasaun hosi Diretor Eskola atu  fo nota ba estudante sira bazeia ba rezultadu husi teste diariu, traballu grupu, traballu de casa, lista prezensa no komportmentu durante periodu trimestral da-uluk. Koordenador Ensini Baziku Filial 1.2 Vaniria mos afirma katak nia hetan ona orientasau hosi MEJD hodi fo notas ba estudante sira bazeia deit ba traballu grupu, traballu individu no parstisipasaun aula estudante sira nian durante periodu trimestral da-uluk.

Autor