Parte Dauluk - Memória ho La Sama iha Uma Pisangan

Parte Dauluk - Memória ho La Sama iha Uma Pisangan

Iha inísiu 1998, companheiro La Sama (Fernando de Araújo) sai husi Lembaga Pemasyarakatan (LP) Klas I Cipinang, maibé nu’udar Tahanan Luar. Maski sai ona husi prizaun, la signifika companheiro La Sama livre total. Companheiro La Sama, sei nafatin Tahanan Luar, tanba iha biban ne’ebá, seidauk iha desizaun husi Prezidente Repúblika Indonézia nian. Desizaun Prezidente RI ne’e, foin fó sai iha 1999: “Keputusan Presiden Republik Indonesia Nomor 173 Tahun 1999 Tentang Pemberian Amnesti” ba prisioneiru polítiku sira, inklui João Camara no prisioneiru sira seluk husi Timor, Aceh, Papua nomós rai seluk iha Indonézia.

Sai husi LP. Cipinang compnheiro La Sama ne’ebé ami bolu Maun Nando mai hela iha uma ida iha Jl. Pisangan Baru Timur V, Kebon Sereh, RT 004 No.1, Jatinegara, Jakarta Timur. Uma ne’ebé estratéjiku tebes ba resisténsia tanba besik liu Maun Boot Xanana Gusmão iha comarca Cipinang.

Iha uma Pisangan ne’e, ami hamutuk nain 6 mak hela iha ne’eba, Maun Nando, Maun Gil “Lamukan Fera Kakutak”, Companheiro “Asanami Watumisa”, Filipus Nino Pereira, Amancio Marques “Mau Keri”, no hau rasik. Ikus mai, fulan tolu molok asaun 12 Juñu 1998 iha Depertemen Luar Negeri (DEPLU), aumenta tan nain rua; companheira Mica Barreto husi Semarang. Compnaheira Mica mai hamutuk ho ami iha Pisangan hodi ho haforsa ekipa komunikasaun hamutuk ho Maun Gill Lamukan. Hafoin ne’e, Nuno Rodrigues “Naralikare,” wainhira fila husi Londres iha 1998 nia klaran tuir Kursu Jurnalismu iha Cardiff, Reinu Unido mai mós hamutuk iha Pisangan. Ami hotu, molok ne’e husi fatin ketak-ketak: companheiro Asanami ho Nino husi Malang, Jawa Timur; companheira Mica husi Semarang, Jawa Tengah; Maun Gil Lamukan, Nuno, Amancio no hau husi Depok, besik Campus Universitas Indonesia, Jakarta.

Molok ami hela hamutuk iha Pisangan ho Maun Nando, ho maluk ativista Timor oan sira balun iha Jakarta no sidade seluk iha Indonézia, ami hasoru ona Maun Nando kuaze cada semana iha comarca Cipinang. Iha biban ne’eba, vizita prisioneiru polítiku sira liu-liu Maun Bo’ot Kay Rala Xanana Gusmão halo semana ida dala ida. Biban seluk ne’ebé bele tama ba comarca Cipinang mak, ho maluk estudantes IMPETTU Jakarta, ami ba tebe bola hasoru ekipa prisioneiru sira ne’ebé Maun Bo’ot Xanana forma iha iha comarca laran.

Kualia uituan kona-ba Uma Pisangan, iha biban ne’ebá, fatin ne’e sai hanesan base ida/edifísiu RENETIL nian, maibé sai mós fatin tránzitu ba demonstrasaun lubuk ne’ebé Timor-oan sira halo iha Jakarta. Uma Pisangan, sai mós ponte informasaun ka koordinasaun ida entre Maun Bo’ot Xanana iha comarca laran, ho ema resisténsia sira iha Timor no iha rai-liur. Sai mós sentru informasaun ba ativista ka grupu solidariedade sira iha Indonézia no rai liur nomós jornalista sira ne’ebé buka informasaun relasiona ho resisténsia. Sai mós base ba Unidade Estratégica da Resisténcia – da RENETIL (UNER) Haksolok, Jakarta.

Uma Pisangan ne’ebé ami hela ba, hetan tulun husi Bung TASS (Tri Agus Siswowiharjo), husi Pijar Indonesia no Solidaritas Indonesia untuk Penyelesaian Damai Timor Leste (SOLIDAMOR). TASS, nu’udar ativista pro demokrasia Indonézia no eis prisioneriu polítiku ida ne’ebé molok Soeharta monu, nia dadur hamutuk ho Maun Nando iha Cipinang no sira na’in rua sai belun diak liu iha comarca laran, haree malu hanesan maun alin rasik. Bung TASS maka hetan uma ne’e no uza nia KTP hodi garantia aluga uma ba ami, tanba iha biban ne’ebá, susar uituan ba Timor oan atu aluga uma tau sira nia naran iha contrato. Iha sikun seluk, atu uma na’in mós labele hatene naran ema sira ne’ebé aluga iha uma ne’e, liu-liu Maun Nando.

Iha Uma Pisangan ami sira foin sa’e ne’e apredende buat barak husi Maun Nando, liu-liu oinsá haforsa organizasaun massa, ho calma no dedikasaun tomak, haburas no hametin liután linha koordinasaun entre ami ho Maun Boot iha Cipinang laran. Nune’e mós oinsá hakbiit liután koordenasaun entre Timor-oan ho ativista pro demokrasia Indonézia ka grupu solidariedade ne’ebé mós luta ba direitu emar Timor nian ba ukun rasik an.

Iha grupu solidariedade Indonézia lubuk ne’ebé ami halo ligasaun ho diak, hanesan Forum Solidaritas untuk Rakyat Timor Lorosa’e (FORTILOS), PIJAR Indonesia, SOLIDAMOR, Sarikat Buruh Sejahtera Indonesia (SBSI), Pusat Perjuangan Buruh Indonesia (PPBI) ne’ebé lidera husi Dita Indah Sari, Perhimpunan Mahasiswa Katolik Republik Indonesia (PMKRI), Persatuan Rakyat Demokratik (PRD) ne’ebé ikus mai sai Partai Rakyat Demokratik ho nia sanak organizasaun masa balun hanesan Solidaritas Mahasiswa Indonesia untuk Demokrasi (SMID), Selidaritas Perjuangan Rakyat Indonesia untuk Maubere (SPRIM) ne’ebé jere husi comrade Wilson no ativista pro demokrasia sira iha universidade sira, inklui estudante musulmanu Timor oan sira iha Muhammadiah Jakarta no sst.

Ezemplu konkreta ne’ebé ami hala’o ho grupu ativista Indonézia sira, maka ho FORTILOS ho Hilmar Farid ho nia kaben Agun Putri, Gun Ayu ho nia kaben John Roosa, nomós Maun Nug Kacasungkana ho Mana Titi Irawati sempre halo workshop ka diskusaun hodi análize problema sosiál no polítika ho tópiku oin-oin hamutuk ho membru RENETIL sira kona-ba luta ba libertasaun nasional Timor nian.

Bazea ba koordinasaun ho mana Titi Irawati husi FORTILOS no Aliansi Jurnalis Independen no Institut Studi dan Arus Informasi mak kursu jornalismo iha Bukit Do’a Tali Takum, Ciloto, Bogor hahú no ikus mai revista TALITAKUM moris. Diskusaun entre militantes RENETIL iha Jakarta ho FORTILOS, sa’e embrio hodi harii organizasaun ida naran Sahe Study Club (SSC). Hafoin ukun an,  SSC muda naran ba Sahe Institute for Liberation (SIL) no ikus mai muda tan naran ba Institutu ba Libertasaun Nasional.

Iha uma Pisangan, dalaruma ami hetan tulun mós husi Tim Relawan no individu lubuk ne’ebé la temi sira nia naran ida-idak iha ne’e. Maun Nando conhesa sira barak no conhese diakliu wainhira nia sei prizaun laran. Iha mós individu sira seluk ne’ebé fó sira nia kontribuisaun moral no material ba resistensia maka liu-liu Ibu Ade Rostina Sitompul ho nia família. Ibu Ade, hala’o servisu kleur liu ona hamutuk ho mana Mindo Radjaguguk vizita comarca, suporta prisoneiru polítiku Timor-oan sira ne’ebé tama uluk liu iha tinan 1980 mai leten molok Maun Bo’ot ba comarca iha Cipinang. Grupu prisioneiro polítiku Timor sira mak hanesan David Dias Ximenes, Katuas Albino nsst. Ibu Ade ho Mindo mós bukan meius hodi tulun saudozu Mauk Moruk halai sai husi Indonézia ba liu.

Iha mós família ida naran Pak Isa ho nia kaben Ibu Gartini (almarhum & Almarhumah ona), ne’ebé wainhira Maun Bo’ot sei iha Cipinang sempre vizita. Wainhira maun Bo’ot muda mai Rumah Tahanan iha Salemba, vizita regularmente iha semana ida nia laran. Hau sei lembra kuandu Maun Bo’ot muda fofoun ba nia Rumah Tahanan, sasan uma laran nian balun Pak Isa ho Ibu Gartini mak hatama. Iha mós ativista balun Asoka Siahaan, Atiek Nurhayati no individu sira seluk tan ne’ebé nungka hatudu an maibé fó sira nia kontribuisaun lubun bo’ot.

Kualia kona-ba Uma Pisangan, sei la ses mós husi kontribuisaun família uma nain nia laran diak. Avo-ferik ida ho nia família ne’ebé hela iha estrada oin, la mete polítika, maibé fó kontribuisaun boot ba Timor oan sira mai iha uma Pisangan atu halo asaun ruma. Sira loke Warung ida no dalaruma ami bele deve hahan, kuandu iha osan mak selu. Tanba sira besik liu ami, sira haree ami hanesan família no sira mós aseita atu tau naran “Cantina de Leste” ba sira nia Warung. Cantina de Leste sai fatin ne’ebé dalabarak Maun Nando ba ne’ebá ho han ka hemu kafé no dada lia ho avo-ferik. Dalaruma jornalista husi laran no rai liur mós mai halo cobertura iha ne’ebá. 

Avo-ferik ne’e ho nia família espesiál tebes ba ami iha Pisangan. Avo-ferik konsidera ami hotu iha Pisangan hanesan nia oan ka bei-oan rasik. Kuandu nia rona, istória husi ami kona-ba violasaun direitus umanus ne’ebé komete husi rezime militár Indonézia iha Timor, avo-ferik sente triste tebes, no dalaruma tanis. Wanhira ami fó hatene ba avo-ferik katak Maun Nando uluk kastigu iha LP. Cipinang besik tinan 9, avo-ferik hakfodak tebes tanba Maun Nando ema ida nonok no ladun kualia barak. Durante iha Pisangan ami nota simpatia avo-ferik ne’e ho nia família ba ita nia luta sa’e maka’as no la apoia hahalok rezime Orde Baru. Ba ida ne’e, sira hatudu liuhusi tau matan no sai belun diak ka família ba ami iha Pisangan. Iha biban ne’ebá avo-ferik moras tensaun no dalaruma wainhira ami dada lia halimar ho nia, nia dada iis sala-sala. Dalaruma ami mós tau matan ba nia, ezemplu companheiro Elvis Oliveira, Livio Santos no hau, kumu nia ain atu nune’e nia bele sente diak.  

Wainhira Prezidente B.J. Habibie fó sai opsaun rua ba Timor-oan atu hili: Rejeiita Autonomia (Ukun an) ka hili Autononia hodi hamutuk nafatin ho Indonézia iha Konsulta Popular, ami ne’ebé estuda iha Indonézia barak tebes mak idak-idak hahú fila mai Timor. Iha biban ne’ebá inklui mós ami ne’ebé hela iha Uma Pisangan, fila mai Timor hodi halo kerja basis (servisu iha baze) halo kampaña door to door hamutuk ho jovem sira sira iha Timor atu nune’e povu bele rejeita autonomia. Avo-ferik ne’ebé hatene ona ami idak-idak hahú sai ona husi Pisangan, sente triste tebes no loron-loron tanis hela deit. Iha loron ida, nia dehan: “Anak-anaku yang sudah pulang ke Timor itu mereka ngak bakalan ketemu saya lagi sampai saya meninggal - (Hau nia oan sira ne’ebé fila ona ba Timor ne’e, ne’e sira sei la hasoru ona hau to’o hau mate.” Ida ne’e nia refere ba Companheiro Asanami ho sira seluk ne’ebé fila uluk ona mai Timor.  

Iha mediu fulan Juñu kuandu hau ho companheiro balun atu fila tan mai Timor, loron ne’e, avo-ferik rona ona no tanis los. Wainhira Bis Metro Mini ne’ebé ami aluga atu ba Pelabuhan Tanjung Priok hodi sa’e K.M. Dobon Solo, mai para ona iha Warung Cantina de Leste nia oin tula karon bo’ot sira lubuk nakonu ho ropa ne’ebé Tim Relawan Indonézia sira halibur atu lori mai fó ba Diocese Dili hodi fahe ba deslokadu sira, derepente avo-ferik halai ba mai tanis hanesan ema ruma mate ona.

Kalian mau pulang semua ke Timor ya?” Avo-ferik husu ami ho tanis los. “Tidak Bu, kami ke Tanjung Priok saja untuk jemput teman-teman yang baru tiba dari Timor – (La’e Avo-ferik, ami ba deit Tanjung Priok atu foti kolega sira foin to’o husi Timor.” Ami tengki hatan ho nune’e atu avo-ferik bele sente diak uituan, tanba ami mós lakohi buat ruma akontese ba nia vida. Triste tebes, iha fulan Agostu nia laran wainhira ami iha ona Timor, nia bei-oan naran Sandra fó hatene katak avo-ferik husik ona ita ba mundu seluk. “Avo nia saúdé aat liutan wainhira imi ba Timor, tanba nia triste hela deit hanoin imi,” dehan Sandra ho triste mós. Wainhira atu halot avo-ferik ba nia fatin hakmatek ikus nian, companheiro Amancio ho companheiro Pompeia ne’ebé sei hela iha Pisangan, tulun mós família matebian hodi foti avo-ferik nia kaixaun.

Comunidade sira iha Gang Pisangan laran mós diak ho ami maibé sira nungka hatene kona-ba Maun Nando. Se iha buat ruma relasiona ho Gang Pisangan, ami sira foinsa’e ne’e mak ba kolabora ho sira. Sira nungka halo problema ho ami nia presensa ne’ebé dalabarak Timor-oan sira lubuk molok no hafoin asaun ruma, sempre la’o ba mai iha bairo laran. Dalaruma Kepala RT husu ami; “ema barak ne’e mai halo saida?” Maun Nando hateten ba ami katak se sira husu karik, dehan deit sira mai tuir kursus. Dalaruma Kepala RT husu ami tuir Ronda kalan, la’o haleu hodi tau matan ba seguransa bairo nian. Ami husik maun sira hala’o servisu seluk, no ami alin sira ne’e mak tuir Ronda. Hala’o Ronda ho komunidade ne’e liu-liu kuandu besik Pemilihan Umum Indonézia nian.

Parte Daruak - Funsionamentu Uma Pisangan

Autor