Parte Daruak - Funsionamentu Uma Pisangan

Foto ETAN

Uma Pisangan sempre sai fatin tránzitu ba estudantes sira husi Jawa, Bali, no sira ne’ebé kuliah ka iskola universidade sira iha Medan, ne’ebé mai Jakarta halo festa (demonstrasaun). Ami temi festa atu nune’e kuandu haruka Telegrama ka telefone ba kolega sira atu mai Jakarta, karik intelijénsia Indonézia sira labele nota liafuan ne’ebé ami uza. Iha mós membru FALINTIL ida ho naran Alende ne’ebé uluk nu’udar escolto Maun Bo’ot nian iha ailaran ho maluk estafeta ida husi Região 1 Ponta Leste husi grupu Kay Rala Lian, Companheiro Calvario Savio, mós mai iha Uma Pisangan ba tempu lubuk ho ami.   

La’ós ne’e deit maibé dalabarak, fundador RENETIL ida iha Depok companheiro João Travolta no companheiro balun UNER Haksolok nian mai mós konsentra iha Pisangan fó apoia lojístika wainhira iha preparasaun ruma atu halo asaun ka eventu ruma. Sira husi UNER Haksolok ne’e mak hanesan; Companheiro Asagiwai (Eurozio dos Reis), Umuseque (Gregorio Correia), Bere Fuik (Livio dos Santos), Mau Muti (Vitorino dos Reis), Loisau (Anselmo Coimbra, Naben, Assucai, Ira Restu (Joaquim dos Santos), Halu Macar (Acio Caminha) Sakunar, Lai Hara, no companheiro Nene “Craras” (matebian ona). Sira ne’e, regularmente mai Uma Pisangan hodi tuir sorumutu ka hodi buka tuir planu ka asaun saída mak atu halo iha futuru.

Uma Pisangan, dalaruma bele fasilita to’o ema na’in 20 ka 30. Mai toba iha ne’ebá molok no hafoin demonstrasaun, liulu wainhira demonstrasaun 12 Juñu 1998 iha DEPLU. Wainhira companheiro/a barak mai iha Uma Pisangan, toba fatin mós la to’o, nune’e halo ami tenki toba sena malu. Dalabarak, iha kalan, balun hader la’o pasiar tiha, sira seluk toba uluk lai no hader mak balun toba loron fali. Biti iha, maibé la to’o, nune’e ami hadau malu jornal tuan ka kaixa mamuk, nahe deit iha sala vizita, iha área dapur no iha kuartu laran hodi toba.

Kondisaun Uma Pisangan ho kuartu kiik lima ho medida 2x3 ho dapur, haris fatin no sintina ida ne’ebé klot. Kuartu ida besik odanmatan oin, ba Maun Nando ho Maun Gil. Sira nia kuartu ne’e mós sai hanesan fatin ba Secretário Diresaun Geral RENETIL iha Indonézia (DIGERIN) Companheiro Russuo, se nia mai Jakarta husi Yogyakarta hala’o servisu ruma. Kuartu kiik rua iha leten ba Companheiro Asanami, Nino Pereira, hau no Amancio. Iha kuartu ne’e nia oin, iha janela kiik ida hodi asesu ba uma leten, só úniku fatin hodi habai ropa iha kalen leten. Iha nia oin, iha espasu kiik ne’ebé dalabarak ami uza hodi pinta ka hakerek banner no poster sira hodi lori ba asaun, hanesan: Asaun 3 April 1998 iha embaixada Reinu Unido nia oin, Iha 12 Juñu 1998 iha DEPLU, 7 Dezembru 1998 iha Perwakilan PBB nia oin, Iha Kementrian Kehakiman, Komnas HAM, Embaixada Estadus Unidos America, iha Cipinang, no seluk tan.

Se Adjunto Sector III, Companheiro Loiwacu Nelukala (Pedrito, Comandante Brigade Berdarah), ka Adjunto ho Responsavel Sector I ne’ebé toma konta Bali no Lombok ka Adjunto Sector II ne’ebé toma konta Jawa Timur, nomós Responsavel Prinsipal (RP) UNER sira mak mai vizita, antaun ami toba sena malu hamutuk iha ami nia kuartu ka hamutuk iha sala vizita hadau malu jornal ka kaixa mamuk hodi toba. Se Companheira Buibere sira mak vizita, companheira Mica mak fahe nia kuartu kiik ne’e ho sira.  

Mica nia kuartu ne’e tuir lolos sai gudang, tanba kuartu ne’e mós kiik tebes. Kuartu ne’e la iha janela, maibé ho deit ventilasaun kiik (hanesan ventilasaun sintina nian) iha leten. Mika nia ventilasaun ne’e tanba fatin seguru, ema la nota nune’e hau uza hanesan fatin hodi subar kilat musan balun. Kilat musan ne’e, maluk Timor-oan ne’ebé nu’udar membru Pasukan Gegana husi Korps Brigade Mobil (BRIMOB) polísia Indonézia nian baze iha Quartel Kelapa Dua, Jakarta Selatan mak fó hodi tau hamutuk atu lori mai Timor fó ba funu na’in FALINTIL. Maluk BRIMOB sira ne’ebé iha kontaktu direita ho ami iha Pisangan, hafoin rezultadu Consulta Popular fó sai, sira mós halai mai Timor no balun agora sai membru PNTL.    

Kona-ba halo ligasaun ho BRIMOB Timor-oan sira, iha RENETIL hanorin kona-ba mobilizasaun masa. Dirigente RENETIL sira, inklui Maun Nando mós fó instrusaun katak militante RENETIL idak-idak tenke servisu maka’as no tenke hakbesik no halo koordinasaun diak ho Timor-oan hotu-hotu ne’ebé iha hanoin ba nia rain no hakarak ukun rasik an, biar sira ne’e sai ona liman kroat Indonézia nian. Ami hatene ida ne’e perigoju tebes, liu-liu ba maluk BRIMOB sira, maibé tanba funu no hakarak ukun rasik an mak halo ita tenke buka malu, no tau laran tauk ne’e ba kotuk. Dalaruma ami iha Pisangan mak ba vizita sira iha Quartel BRIMOB, Kelapa Dua, Jakarta Selatan. Dalaruma sira balun mak mai rasik iha Uma Pisangan. Ligasaun entre militante RENETIL iha Jakarta ho BRIMOB sira diak tebes, ne’e tanba karik balun iha relasaun família, balun uluk ami iha Sekolah Dasar (SD) no Sekolah Menengah Pertama (SMP) hamutuk iha Timor.  Maibé atu hateten katak sira fó an ba resisténsia tanba, sira mós nu’udar nasionalista, nu’udar Timor-oan no hakarak ukun rasik an duni.

Kuartu ida iha klaran, ami uza ba edifísiu RENETIL. Kuartu ne’e kompletu ho computador desktop ida, Printer ida no telefone landline ida nomós livru lubuk. Ema la naran tama ka asesu ba kuartu edifísiu ne’e, no se deit la autoriza toba iha laran. Ami sira hela metin iha Pisangan mós só bele tama hodi hala’o servisu ruma, simu telefone maibé la’ós atu uza ba toba fatin. Tanba, dalabarak Maun Bo’ot Xanana telefone mai Pisangan husi comarca Cipinang, haruka ba foti surat iha nia estafeta ida (kurir LP. Cipinang) ho naran inisial “J” atu faximail ba liur ka Timor, ka telefone atu kualia ho Maun Nando, Companheiro Russuo, Companheiro Lamukan ka Asanami, antaun labele naran ema simu Maun Bo’ot nia telefone. 

Ezemplu ida wainhira Maun Bo’ot Xanana telefone mai Pisangan, haruka companheiro Asanami ho hau ba hasoru no kualia ho eis prisioneiru (eis membru KOPASSUS) ida ne’ebé foin sai husi Cipinang. Ema eis prisioneiru ne’e kolega ho Maun Bo’ot durante sei iha comarca Cipinang. Tuir ami rona, nia ba kastigu iha comarca Cipinang nu’udar tahanan kriminal ida tanba oho ema sivil. Ami ba hasoru nia iha Terminal Kampung Melayu, iha Jembatan Layan nia okos atu halo negósiu ho nia hodi sosa kilat ba FALINTIL. Fatin ne’e barulho ho negosiante kiik barak tebes, tráfiku ho kareta nia apita lian bo’ot, la’o ba mai iha leten, husi ami nia liman karuk no los. Atu kualia ba malu, tenke lian maka’as uituan mak foin bele rona malu. Tuir informasaun ne’ebé ami recolha, Maun Bo’ot nia maluk prisioneiru ne’e iha ligasaun ho ema hein gudang (armazen) armas militár ida iha Jawa Barat. Wainhira dada lia ho nia, husu kilat nia presu no seluk tan, ami nota katak presu kilat ne’ebé karun liu ita nia kapasidade atu sosa. Nia mós sisi ami atu fó uluk uang muka (osan balun) ne’ebé ho montantes bo’ot liu ami nia espetativa. Wainhira nia hahú ona sisi ami atu fó hatene ami nia hela fatin, ami hakotu lalais negósia ho nia no Asanami dehan deit horsida ami konsulta lai ho Pak Xanana mak fó hatene nia rezultadu. Ami fila ba Uma Pisangan, companheiro Asanami telefone ba Maun Bo’ot katak diakliu kansela deit, no hakotu ligasaun ho ema ne’e tanba ami nia laran ka firasat ba ema ne’e ladun diak bazeia ba rezultadu hasoru malu ho nia. Maun Bo’ot mós aseita no la kontinua halo negósiu ho nia maluk prisioneiru ne’e.

Dalabarak mós, estudantes ka companheiro sira ne’ebé mai Uma Pisangan, la conhese dirigente RENETIL sira iha Pisangan momentu ne’ebá, inklui Maun Nando no Maun Gill Lamukan. Sira barak rona ona Maun Nando nia naran bo’ot wainhira sei iha comarca Cipinang, maibé seidauk hasoru. Hau sei lembra compenheiro/a balun ne’ebé foin to’o Pisangan mai husi UNER/cidade seluk, husu Maun Nando mak ida ne’ebé wainhira maun Nando dalaruma tur hela iha ne’ebá. Sira balun kuandu mai vizita pisangan ho comboio tun iha Stasiun Jatinegara dadersan rai sei nakukun, telefone mai Pisangan Maun Nando ka Maun Gil mak simu uluk telefone, tanba sira nia kuartu mak besik liu edifísiu ne’e, fahe malu deit ho didin triplex. Maluk sira foin to’o Stasiun Jatinegara ka Stasiun Pasar Senen ne’e, dalabarak haruka tenki ba jemput ka simu sira iha estasaun. Biar nune’e, Maun Nando sempre pasiensia simu sira nia telephone, no fanun ami mak ba jemput sira. 

Uma Pisangan tuir lolos besik liu Stasiun Jatinegara, menos kilometru 1 maibé do’ok husi Pasar Senen. Tanba ne’e, ami sempre fó hatene diresaun molok companheiro sira mai Jakarta. Maski nune’e, sira barak kuandu to’o estasaun sei telefone nafatin haruka ba jemput tanba sira barak matan foun iha Jakarta. Dalabarak mós, sira husi fatin seluk to’o Uma Pisangan mai dere odamatan, dalaurma maun Nando ka Maun Gil mak loke uluk odanmatan ba sira. Balun la conhese katak afinal Maun Nando mak foin loke hela odanmatan ba sira. Balun mós dalaruma husu mai ami, maun ida alturas fuk kribun ne’e mak se?. Antaun ami tenke isplika ba sira, pozisaun Maun Gil ka maun sira idak-idak iha RENETIL. 

Loron ida iha 24 Abril 1998, iha kalan ikus kuandu militantes RENETIL lubuk ida husi UNER oin-oin iha Indonézia tuir Kursu Jurnalizmu, ne’ebé ikus mai harii revista TALITAKUM, iha Ciloto, Bogor, Jawa-Barat, iha planu ona katak Maun Nando atu mai kualia ho ami partisipantes sira iha kalan ne’e. Nia mai atu dada lia ho ami, fahe nia esperiénsia kona-ba oinsá harii organizasaun, hametin koordenasan no komunikasaun diak iha rezisténsia ne’ebé forte entre orgaun resisténsia sira, ho kada UNER, entre militantes RENETIL nomós importánsia média alternativa ba luta ba ukun rasik an. Iha biban ne’ebá, companheiro balun mós seidauk hasoru Maun Nando. Iha kalan ne’e, Maun Nando fahe nia esperiensia, kualia ho ami ho lian mamar los no neneik. Companheiro balun dehan, Maun Nando ne’e kualia mamar no neneik los maibé ema la hatene katak afinal nia revolusionáriu ida. Kalan ikus Kursu Jurnalizmu ne’e, ami hakotu ho haree filme dokumentáriu ‘Movimentu Demokrasia 89’ ne’ebé hatudu ema foin sa’e eróiku Xineza sira halo protesta hasoru sira nia governu, no ikus mai rezulta Massacre iha Tiannanmen Square, iha 1989. 

Memória hamutuk ho Maun Nando iha Uma Pisangan, konta la hotu. Maun Nando ne’ebé ami hatene iha Pisangan, dalabarak nia mak hader uluk. Wainhira ami hader, dalabarak nia halo ona kafé, ka xá no husu ami atu hemu ho nia. Nia mós sempre ajuda ami tein ba han kalan ka meudia nian, dasa rai, hamoos uma laran. Kuandu nia atu han, sempre husu ami, “imi han ona ka la’e?” Dalaruma ami rai nia hahan mak nia seidauk han, mak companheiro ida foin to’o Uma Pisangan husi UNER seluk, maun Nando haruka han nia hahan ne’ebé ami rai, biar nia rasik seudauk han. Dalaruma mós ami atu han meiu dia, nia dehan “rai Maun Gil nian hahan, tanba nia foin toba dader ne’e.” Kuandu loraik tuku 2 ka 3 Maun Gil hader atu han meiu dia, hahan hotu ona tanba companheiro balun foin mosu mai, Maun Nando haruka haruka han tiha Maun Gil nian.

Iha biban ida, Nelson Correia, dirigente AST/PST (Asosiasaun Sosialista Timor/Partido Socialista Timor), moras hela iha Uma Pisangan hafoin asaun DEPLU no asaun ida iha Residénsia Prezidente Habibie nian iha Menteng.  Maun Nando sente laran susar tebes, tanba ami hotu osan la iha atu sosa aimoruk ba Nelson. Hahan mós dalabarak ami han etu maran, kahur ho kecap manis ka terasi. Companheira Mica Bareto maka loron-loron, foti fos uituan, tein halo sasoro kahur ho lis mutin hodi fó ba Nelson to’o nia saúde diak fali. Maun Nando mós hakfodak, aimoruk la iha maibé ho deit sasoro kahur ho lis mutin, Nelson bele sai diak. Ho ida ne’e maka husi loron ne’e kedas, Nelson mós bolu ona Mica, Dotora Mica. 

Kondisaun uma Pisangan ne’ebé sempre sai fatin ba companheiro barak, maibé ho haris fatin ida deit halo ami mós tenke hein malu atu ba haris ka sintina. Dalabrak, ami la disiplina hamoos ka mantein haris fatin atu sai moos no iha ijiene diak.

Iha loron ida, Maun Gil ho karik Amancio, hoban hela sira nia ropa iha basia kor matak ida kuaze loron 3 ona kala haluha seidauk fase. Wainhira ami atu tama ba haris fatin ne’e, iis los. Maun Nando mós kala la tahan liu ona ropa foer ne’e nia iis ka dois, no nia husu hau; “Se nia ropa mak ne’e, Lito? Loron hira ona hoban hela deit la fase be halo haris fatin iis los nee.” Hau hatan;“Karik Amancio nia, maun. Husik ba nia nain mak mai fase rasik,” maski hau seidauk haree ropa ne’e lolos se nian. Hau mós la’o sai dadauk ba tiha liur, kuandu hau fila mai uma, ropa sira ne’e habai tiha ona iha iha kalen leten. Afinal Maun Nando mak fase hotu ona ropa hoban loron tolu ona, bee iis los ne’e. 

Coragem husi Maun Nando no Mogok Makan

Hanesan bain-bain, se ami la halo buat ruma, iha Uma Pisangan ami sempre tur iha sala vizita ho kafe manas. Dalabarak, dada lia ho maun Nando ka ho maun sira seluk iha RENETIL kona-ba asuntu saída deit relasiona ho Timor, ka buat saída deit kona-ba moris nian. Dalaruma ho sira ne’ebé foin vizita mai Pisangan husi UNER seluk, ami fahe esperiénsia ba malu kona-ba idak-idak nia servisu UNER nian, iha universidade, iha cidade ne’ebé sira hela ba. Ami fahe mós notísia kondisaun ikus situasaun iha Timor, ka naran goja malu halimar hanesan maun-alin.  Dalaruma, ami tuur nonok iha sala vizita, matan hateke hotu deit ba televizaun tuan ida hodi akompaña notísia Indonézia. Iha loraik ida, ami tur dadalia iha sala vizita, derepente Maun Nando husu hau: “Lito, o hatene uza komputador ka lae?” Hau hatan “Hatene uituan deit, maun” ha.” “O ho Amancio tenki aprende computador tanba agora ne’e era teknolojia modernu,” dehan Maun Nando hodi fó coragem nafatin ba ami aprende no adapta teknolojia modernu nian. 

Iha hau nia laran sente orgullu tebes bele koñese ema ida hanesan Maun Nando, nu’udar nia companheiro maibé mós haree ami hanesan nia alin rasik. Maun ida ne’ebé molok hau mai Jakarta, iha Timor so rona deit nia naran liuhusi notísia wainhira nia tama ona comarca. Tama comarca tanba Maun Nando ho estudantes foinsa’e resisnténsia lubuk ida halo asaun protesta iha  loron 19 Novembru 1991 hodi kontra hahalok rezime militár Indonézia ne’ebé halo massacre halakon foinsa’e Timor-oan lubuk ida nia vida, iha Cemiterio Santa Cruz, 12 Novembru 1991. La imajina iha loron ida, Maun Nando sai husi Cipinang, hau bele hetan oportunidade ida bele hela hamutuk ho nia iha uma ida. Privileiju bo’ot ba hau ho maluk sira balun iha Jakarta. 

Ho coragem sira ne’ebé Maun Nando fó mai ami alin sira, liu-liu iha area komputerizasaun, iha hau nia laran hanoin hela, kala Maun Nando mós komptutador mahir ona karik. Ne’e tanba kuandu Maun Russuo mai Pisangan lori hela nia komputador laptop Toshiba mahar Bo’ot ida, nomós Maun Gil Lamukan nian, hau sempre haree maun Nando dalaruma uza sira nia laptop. Ikus mai, Maun Nando mós hola nia laptop ida. Iha loron ida wainhira maun Nando foin fila mai husi Estadus Unidos America, Maun Nando kala iha problema uituan ho nia namorada iha biban ne’ebá, Mana Zilstra. Nia nu’udar ativista Indonézia ida ne’ebé mós suporta maka’as Timor-oan sira nia luta ba ukun rasik an, nomós servisu iha SOLIDAMOR. Iha loron ida, Maun Nando nia laptop iha kuartu edifísiu ne’e, iha nia screensaver hakerek ho liafuan halai putar ba putar mai dehan “Secjen Lagi Kasmaran.” Hau la hatene se mak hakerek, maibé ikus mai hau rona katak maun sira mak goja malu. Maun Nando kala curhat hela ho Maun Gil no Maun Russuo kona-ba nia problema ho Mana Zilstra, antaun maun Gil kala hakerek iha screensaver laptop Maun Nando nian. Molok ne’e, Maun Nando mós haree ona liafuan iha screensaver ne’e no koko atu delete, maibé nia la hatene oinsá hasai.  

Iha loron ida tan maun Nando husu hau; “Lito, o foti jurusan saida?” Hau hatan; “Administrasi Niaga, Maun, mas hau Cuti hela.” Momentu ne’ebá asaun reformasi manas ona, ne’ebé kuandu hau ba kampus mós la fokus ona estuda.  Iha biban ne’ebá, dalabrak kuandu to’o Kampus Institut Ilmu Sosial dan Politik (IISIP) iha Lenteng Agung, Jakarta Selatan, kolega estudantes Indonézia sira mós prepara ona atu ba demo, antaun ba demo deit ona. Iha tinan 1998 no inisu tinan 1999 nia laran, asaun lubuk ne’ebé mós Timor-oan sira halo iha Jakarta, ho nune’e desizaun hodi foti cuti kuliah mak dalan diak liu, no’o to’o Timor ukun an mós la sai Sarjana. 

Biar nune’e, Maun Nando sempre fó coragem ba ami iha Pisangan ne’ebé tinan nurak liu nia atu nafatin kuliah. Maun Nando rasik, tanba funu no tanba sai prisioneiru polítiku besik tinan 9, lakon oportunidade barak tebes, ba kuliah. Maun Nando mós ‘Sem Titulo’ to’o Timor ukun an no to’o nia mate. Ami lubuk bo’ot reflete duni motto RENETIL nian “Antes Sem Títitulo do que Sem Pátria – Diak liu lakon titulu duke lakon ita nia rai.”

Ho ezemplu sira temi iha leten, Maun Nando rasik sei susar no kuran iha buat balun, maibé nia sempre fó coragen ba ema seluk atu buka matenek, hakbiit nia an no sai diak liutan. Hanesan mós wainhira nia haruka hau ho Amancio tenke aprende komputador atu adapta ba teknolojia modernu. Ida ne’e hatudu duni karakter maun Nando nu’udar lider estudantes resisténsia ida ne’ebé exemplar.

Hafoin Soeharto tun no nia Vise B.J. Habibie sa’e ba Prezidente Repúblika Indonézia, maibé reformasai total seidauk realiza. Hanesan ita hotu hatene, iha biban ne’ebá, Dwi Fungsi ABRI seidauk hasai. Prisioneiru polítiku sira husi Timor, liuliu Maun Bo’ot Xanana mós seidauk hasai husi comarca Cipinang. Forças Indonézia iha Timor-Leste mós seidauk dada sai husi Timor. Aspirasaun Timor oan hodi husu referendum mós seidauk realiza. Tanba ne’e maka halo ativista estudantes sira mós la hakmatek, no kuaze loron-loron, iha capital provínsia sira iha Indonézia, sei hala’o nafatin asaun oin-oin hodi husu reformasaun total. Estudantes no foinsa’e Timor-oan lubuk iha cidade sira iha Indonézia no iha Timor-Leste, hanesan Dewan Solidaritas Timor-Timur (DSMTT) mós seidauk para hala’o demonstrasaun kontra rezime Orde Baru ne’ebé ho nia emar sira daet malu, belit metin no sei forte. Iha biban ne’ebá, iha Indonézia, asaun hotu-hotu ami hala’o ona, inklui asaun ida iha Presidente Habibie nian residensia iha Menteng hodi selebre nia loron moris 25 Juñu 1998 ho demo. Ami buka meius oin-oin hodi hala’o asaun ho tipu saida deit atu hamanas nafatin notisias kona-ba Timor-Leste no Indonézia, ba komunidade internasional sira atu resolve lalais Timor leste nia kazu.

Iha loron ida, wainhira dada lia ho ativista PRD iha Posko Reformasi iha Fakultas Kedokteran Universitas Indonesia iha Salemba, Jakarta hateten katak tenki halo fali asaun Mogok Makan (greve de fome) iha fatin ne’e. Maun Nando mós suporta ami nain tolu nia desizaun; companheiro Nino Pereira, hau no companheiro Julio hodi partisipa halo Mogok Makan hamutuk ho Front Nasional untuk Reformasi Total, grupu ida ne’ebé foin harii hafoin Soeharto monu.

Asaun Mogok Makan ne’ebé organiza husi ativista PRD ho RENETIL ne’e tuir planu fahe ba kada grupu. Grupu dahuluk maka hala’o uluk Mogok Makan, to’o loron hira, tuir ida-idak nia kbiit no kondisaun saúde. Se ema ida sente labele liu ona, ezemplu; moras, monu ka tama ospitál maka grupu tuir mai foin bele hatutan fali no kontinua hanesan ne’e to’o target. Ho nune’e maka hau ho companheiro Nino Pereira deside tama grupu dahuluk nian hala’o Mogok Makan ho ativista Indonézia nain rua tan. Companheiro Julio, hein grupu daruak nian, kuandu ami labele liu ona mak sira troka fali.

Hau lembra wainhira tama ona kalan daruak ami hala’o hela Mogok Makan, Maun Nando ba vizita Posko Reformasi, Salemba hodi haree ami nia kondisaun saúde, husu ami diak ka lae no se bele tahan hamalaha ka lae. Iha kalan ne’e, iha ami nia oin Maun Nando simu telefone husi Dr. José Ramos-Horta iha rai liur ne’ebé husu mós kona-ba ami nia kondisaun saúde no situasaun jeral (seguransa no polítika) iha Indonézia depois Soeharto tun. Molok fila ba Uma Pisangan, Maun Nando hakuak ami idak-idak no fó koragem nafatin ba ami atu resiste hamalaha, maibé mós husu se sente labele liu ona, bele para, husik sira seluk mak hatutan fali asaun ne’e. Hau ho companheiro Nino konsegue hala’o Mogok Makan to’o loron tolu, depois companheiro Julio kontinua fali ho nia grupu.

Kontinua ba parte datoluk …  Seguransa iha Uma Pisangan

Autor