SIMU KSOLOK

SIMU KSOLOK

Hahu hosi nia lansamentu ofisial TALITAKUM online iha loron 20 Juñu 2020, hau hetan pergunta husi sani-nain sira konaba tan sa mak rubrika sira iha TALITAKUM mak la aktualiza loro-loron. Makerek-Nain sira mos husu oinsa mak sira bele hakerek ba TALITAKUM.

Pergunta rua ne’e, fo sinal diak. Pergunta ida dauluk, konaba aktualizasaun, bele hatete katak, rubrika sira TALITAKUM nian dada mos ema nia atensaun atu hakarak sani sa mak Makerek Nain sira so’e hela iha TALITAKUM. Pergunta ida daruak, mos hatudu katak, karik TALITAKUM fatin diak ida ba makerek-nain sira atu hakerek no lekar hela sira nia hanoin sira. Ba pergunta rua ne’e, TALITAKUM hakarak hato’o ami nia agradesementu wain. Pergunta rua ne’e, fo sinal katak TALITAKUM hahu hetan atensaun no karik fiar hosi sani-nain no makerek-nain sira.

Nune’e, diak mos, iha biban ida ne’e, hau hakarak aktualiza tan informasaun balun konaba TALITAKUM online nia lalaok publikasaun sira. Karik ne’e, bele hatan netik pergunta rua ne’ebe lekar hela iha leten ho didiak. TALITAKUM online nudar meius komunikasaun sosial regular ida sei aktualiza informasaun sira ba sani-nain sira iha forma rua. Ida mak informasaun sira iha forma Nutisia. Maibe TALITAKUM online nia nutisia sei la fo sai regularmente iha periodu oras eh loron nian, hanesan meius komunikasaun sosial online sira seluk. Nutisia TALITAKUM nian, mai ho forma ida ne’ebe karik bele dura to’o loron 2-3 nia laran. Nune’e, nutisia sira TALITAKUM nian, tenki hakruk ba padraun baziku sira hanesan; nutisia ida, minimu tenki iha fonte informasaun nain rua, nutisia ida labele iha informador anonimu, nutisia bele mai iha formatu features no liu-liu nutisia ne’ebe iha relasaun ho fator importante ruma konaba ema nia moris. Edisaun ida ne’e, TALITAKUM informa sani-nain sira konaba Bee Moos iha  Suku Saburai, Suai.

Ami mos hakarak informa sani-nain sira katak, karik iha informasaun ruma iha formatu nutisia, TALITAKUM sei simu no publika hafoin halo ona revizaun. Ba makerek nain sira ne’ebe mak haruka sira nia informasaun mai TALITAKUM no karik nakfilak ba Nutisia ka Rubrika ruma, ami sei haran sira Kontributor ba TALITAKUM.

TALITAKUM nia rubrika sira, maioria hakerek iha format investigavu, rezultadu peskiza, artigu ruma ho karakter semi-akademiku no oponiaun sira konaba situasaun aktual ruma hosi asuntu importante sira iha seitor, edukasaun, saude, ekonomia, politika, arte no kultura, justisa no seluk-seluk tan. Ba rubrika sira ne’e, TALITAKUM online nia padraun baziku mak kontiudu hosi rubrika sira tenki informativu, aumenta kunesementu ema nian, motiva ema atu hakerek, hamosu debate no mos kontiude rubriku sira ne’e, bele dura to’o semana rua nia laran.

Nune’e, hodi TALITAKUM nia naran, ami Simu Ksolok tebes Sani-Nain no Makerek-Nain sira nia hahusuk no hein katak, ema hotu-hotu, bele kontribui sira nia kunesementu, hodi TALITAKUM habelar ba ema sira seluk ne’ebe hein hela atu sani hanoin sira iha TALITAKUM.

 

6 Jullu 2020

 

Hugo Fernandes

Xefe Editorial

Email: This email address is being protected from spambots. You need JavaScript enabled to view it.

Sitiu Elektroniku: www.talitakum.tl

Autor

  • SIMU KSOLOK

    Hahu hosi nia lansamentu ofisial TALITAKUM online iha loron 20 Juñu 2020, hau hetan pergunta husi sani-nain sira konaba tan sa mak ...

    Jul 06, 2020

  • Ksolok ba Kay Rala Xanana : Ohin o nia otas 74

    Ema hotu hanaran O Maun Boot
    Ema barak lao tuir O nia ain fatin no lalatak

    TALITAKUM

    Iha tinan 1998, estudante – ativista sira hosi RENETIL halibur malu iha Villa Retreat iha Ciloto, Bogor, Java Oeste, Indonezia. Du...

    Jun 20, 2020