Xina nia diplomasia Covid-19 iha Timor-Leste

Foto: ceaweld.com

Peste virus-korona/Covid-19 la’os deit hamosu krizi ba Xina maibé sai mos hanesan oportunidade ida ba Xina atu promove nia identidade ba mundu. 

Iha tempu badak nia laran deit, peste Covid-19 ne’ebe deteta dahuluk iha sidade Wuhan, provinsia Hubei, Xina, iha Dezembru 2019 da’et ona ba kuaze mundu tomak inkluindu Timor-Leste. Surtu pandemia Covid-19 ne’e destrutivu tebes, fo ameasa boot ba siguransa umana nomos paraliza ekonomia. Globalmente oras ne’e, husi ema liu tokon nen mak konfirmadu hetan virus ne’e, ema besik rihun atus hat mak mate ona. Aktividades ekonomia transnasional nian sira kuaze sei paradu tomak. 

Kompara ho nasaun seluk, surtu Covid-19 iha Timor-Leste ladun grave. Desde deteta hetan iha meadus fulan Marsu 2020, seidauk iha transmisaun iha komunidade. Katak kazu konfirmadu sira ne’e importadu husi nasun vizinhu. Husi total konfirmadu ema na’in 24, oras ne’e hotu-hotu rekuperadu. Laiha ida mate. Maski nune, Governu Timor-Leste kontinua halo vijilansia no aplika regras prevensaun tuir padrasun Organizasaun Saúde Mundial (OSM) atu evita propagasaun iha faze sira tuir mai.

Peste ne’e halo kuaze nasaun hotu atrapalhadu, prefere hare ba uma -laran rasik atu oinsa funu hasoru no hakotu propagasaun peste ne’e atu labele da’et tutan ba populasaun tomak. Maibé, Xina, aleinde fo atensaun ba rai-laran rasik no konsidera ultrapasa neneik ho diak, Beijing mos fo-liman ba nasoens seluk liu husi kanal bilateral no multilateral iha forma ajudus international partikularmente ekipamentus no suprementus médikus sira nomos habelar informasoens no konhesimentu sira relasiona ho Covid-19. Xina la’os deit ajuda nasaun menus avansadu sira, maibé Beijing mos loke liras ajuda nasaun dezenvolvidu sira hanesana Italia no Espanha. Jestu hirak ne’e halo parte Xina nia diplomasia Covid-19.

Wainhira iha Fevereiru nia rohan Governu Timor-Leste atrapalha buka ajudus husi nasaun seluk atu funu hasoru Covid-19, Xina liu-husi nia Embaixada iha Dili hato’o kedas disponibilidade. Maski nune, la’os buat hotu ne’ebe Timor-Leste husu hetan resposta pozitivu husi Xina. Purezemplu, Governu Timor-Leste liu husi Ministériu Negosius Estranjeiru husu se Xina bele tulun harii hospital temporariu ida iha Dili atu atende kazu Covid-19 sira. Resposta husi Xina negativu ho razaun nia kapasidade limite no prioridade boot liu fo atensaun ba nia rai-laran. Maibé Xina oferese ona ekipamentus no suprementus médikus hanesan maskra, ekipamentus ba protesaun pesoal, ventiladores, aparelu ba kontrola temperatura no seluk tan liu husi aviaun alugadu. Ajudus husi Xina la’os deit mai husi Governu. Iha mos doasaun husi sidadaun xines, bilioner Jack Ma, liu husi Fundasaun Jack Ma no Fundasaun Alibaba. Halo parte husi politika relasoens ema-ba-ema (people-to peole-relations), sidadaun xines no desendentes xines sira iha rai-laran mos aktivu fo apoiu, hatutan governu xines nia liman. Purezemplu iha Fevereiru 2020, sidadaun xines no desendentes xines (overseas Chinese) sira iha Timor-Leste halibur osan balu fo tuir embaixada Xina iha Timor-Leste hodi ajuda luta hasoru Covid-19 iha Timor-Leste nomos iha Xina.

Ho ajudu sira ne’e, Embaixador xineze ba Timor-Leste Xiao Jianguo deklara katak Xina mak nudar nasaun dahuluk fo doasaun ekipamentus no suprementus médikus ba Timor-Leste. No Xina mos nuudar pais ne’ebe mak fo doasaun maskara protesaun barak liu hotu kompara ho ajudu sira husi fatin seluk. Nasaun seluk ne’ebe fornese mos asistensia iha ba luta hasoru Covid-19 mak Australia, Estadus Unidus, Nova Zelandia, Uniaun Europeia no ajensias Nasoens Unidas inkluindu UNDP ho WHO. Xina mos promete ona sei kontinua fornese ajudus ba Timor-Leste inkluindu vaxine kontra Covid-19 se pronto ona.

Governu no povu Timor-Leste apresia, simu ho haksolok ajudus sira ne’ebe Xina oferese. Kontrariu ho nasaun seluk balu, Xina nia jestu ladun hetan apresiasaun diak. Nasaun balu kritika kona-ba Xina nia produtus ekipamentus no suprementus médikus sira partikularmente relasiona ho kualidade la tuir estandar. Timor-Leste konsidera Xina nia ajudu hanesan komplementaria ba ajudus husi nasoens no organizasoens international sira seluk iha funu hasoru Covid-19.

Sein dúvida katak Xina nia jestu ne’e hatudu boa-vontade (goodwill) atu tulun Timor-Leste no nasoens seluk lori ultra-pasa surtu Covid-19. Maibé iha parte seluk, Xina nia interaksaun hirak ne’e hola parte Beijing nia estratejia politika externa ho objetivu atu promove nia imajen ba mundu nudar frontliner benevolente (benevolent frontliner) iha luta hasoru surtu ne’e. Nunemos, Xina nia atuasaun ne’e atu hatudu ba mundu nudar grande potensia (major power) ida ne’ebe iha responsabilidade bele lolo-liman ba país seluk ne’ebe presija nia tulun iha momentu susar. Ho esperiensia resente ne’e, Xina tenta buka tau nia aan iha oin los hanesan lider global iha ajudus umanitária internasional wainhira nasoens osidental sira seluk preokupa liu ho nesesidades rai-laran. Realidade ne’e bele hare wainhira foin lalais ne’e nasaun boot hanesan Estadus Unidus hakiduk lakoi kontinua halo parte no fo kontribuisaun ba OSM, Xina anunsia ho orgulhu hakarak fo kontribuisaun liu dolar rihun tokon rua ho espetativa atu tulun nasoens sira iha área saude.

Xina nia ajudus umanitária ne’e mos sarat ho interese polítika. Nasaun sira ne’ebe mak rekoñese Taiwan la hetan ajudus direita. Purezemplu, husi nasoens 150 ne’ebe Fundasaun Jack Ma no Alibaba oferese ajuda, hotu-hotu rekoñese Xina nia politika “One China” policy.  Esforsu Jack Ma nian indireitamente hasa’e liu tan reputasaun Beijing iha mundu internasional nudar frontliner iha lusta hasoru Covid-19. Partisipasaun sidadaun xinezes iha Beijing nia diplomasia públiku la’os buat foun. Desde uluk kedas Xina tau konfiansa ba nia sidadaun sira nomos desendente sira, konsidera sira hanesan ponte importante hodi hatutan objetivu Beijing nian relasiona ho kestaun dezenvolvimentu ekonomia no politika soberania nian sira.

Jestu hirak iha leten bele konsidera hanesan soft power ka Xina nia poder suave. Joseph Nye, guru kona-ba soft power define konseitu ne’e nudar “kapasidade atu hetan buat ne’ebe ita hakarak liu-husi dalan atrasaun envezde koersaun ka pagamentus” (the ability to get what you want through attraction rather than coercion or payments). Xina konsidera nia fontes soft power mai husi nia modelu dezenvolvimentu, politika externa, sivilizasaun distintiva nomos nia imajen ba mundu, diferente uituan ho perspektiva konvensional ne’ebe konsidera soft power mai maioria husi nasaun ida nia kultura, valor politikas no politika externa. Ba Xina, soft power nudar meius importante ida atu aprezenta nia aan iha mundu nudar nasaun amigavel, nia asensaun la sai ameasa ba nasaun seluk maski kontinua hetan krítikas oin-oin husi nasoens seluk relasiona ho nia kresimentu ekonomia no militar nomos evidensia sira relasiona ho violasaun direitus umanus. Xina mos hatene katak nia soft power sei fraku kompara ho nasaun grande potensia sira. Ba Xina, nia influensia soft power la nesesariamente tenki domina parte seluk ka konsege muda parte seluk nia ajenda imediata, maibé importante liu mak wainhira nia asaun no prezensa halo parte seluk bele hare kedas ho matan, sente konfortavel, no hetan reasaun pozitivu,

Aleinde fornese ajudus ekipamentus no suprementus médikus, liu husi nia Embaixada iha Timor-Leste, Xina nia reprezentante sira mos buka fahe informasaun kona-ba Xina nia esperiensia oinsa atua no halo prevensaun ba Covid-19 liu husi sorumutu ho instituisaun relevante sira inkluindu organiza video konferensia kona-ba pandemia Covid-19 entre Forsa Defeza Xina no Forsa Defeza Timor-Leste. Aleinde halo sorumutu ho distansia sosial, Xina mos ativamente utiliza meius media lokal no media-sosial hanesan facebook hodi halo publikasaun, fahe informasaun sira, inkluindu halo verifikasaun ba akuzasaun falsu sira kona-ba Xina nia dezenpenhu relasiona ho Covid-19. Aktividades Xina nian ne’e diferente tebes kompara ho sira nia experiensia sira iha pasadu ne’ebe taka aan, la naran fahe ka publika sai informasaun kona-ba aktividades iha rai-laran. Iha parte seluk, wainhira nasaun seluk bolu fila nia sidadaun sira fila ba sira-nia rain, nasaun balu aluga aviaun propria mai tula nia sidadaun sira fila ba sira-nia orijin, Xina la halo. Xina kontinua husik nia sidadaun sira ne’ebe iha Timor-Leste no enkoraja sira atu hela hakmatek no kumpri lei relasiona ho atuasaun Covid-19 iha Timor-Leste.

Xina iha istória naruk fo asistensia iha área saude ba Timor-Leste. Desde Timor-Leste ukun aan, Xina ajuda konstroe klinika balu, haruka nia médiku sira tolu to’o hat mai halo rotasaun kada tinan no ajuda seluk tan relasiona ho área saude nian. Iha 2017, Xina mos haruka nia ró hospital naran Peace Ark vizita Timor-Leste fornese asistensia médikus. Hare husi Xina nia interaksaun durante ne’e ho reasaun pozitivu husi Timor-Leste, bele dehan Xina nia diplomasia Covid-19 iha Timor-Leste hetan suksesu. Nune, sein duvida katak jestu Xina ho nia soft power ne’e hanesan investimentu ida (soft power investment) ne’ebe sarat ho interese ba tempu naruk atu hablear no hametin liu tan Xina nia lasus ho Timor-Leste. Iha parte seluk, Xina mos aproveita oportunidade ka palku Covid-19 nian hodi promove nia imajen katak nia asensaun (the rise of China) ho nia aktividades global sira la sai ameasa ba mundu.

Referensia 

  1. Joseph Nye (2004) Soft power: The means to success in world politics.
  2. Jack Ma: The billionaire trying to stop coronavirus (and fix China's reputation) https://www.bbc.com/news/world-asia-china-52325269
  3. Signed Article by H.E. Dr. Xiao Jianguo, Chinese Ambassador to Timor-Leste,published on Independente http://tl.chineseembassy.org/eng/xwdt/t1784069.htm

Autor