Dalan-Klo’ot

Dalan-Klo’ot

Dalan. Ema hotu hatene sa ida mak ‘dalan.’ Fizikamente, nia nudar marka hodi tudu ita nia hakat. Atu ba natar, ba toos, ba merkadu, ba lia moris ka lia mate ruma, ba eskola ka ba uma-kreda, ita presiza dalan. La’os ita ema de’it mak presiza dalan. Balada sira, atu fuik ka maus, mos presiza dalan. Karau nia dalan, bibi nia dalan, fahi-fuik nia dalan, bibi-rusa nia dalan, nehek nia dalan, samea no ular-oan sira nia dalan. Balada sira be semo mos, ho sira nia instintu (naluri) iha nia dalan rasik atu semo. Ita bele dehan katak, buat hotu-hotu nebe iha kapasidade ka intensaun atu muda-an hosi fatin ida ba fatin seluk, presiza dalan. Meiu-transporte sira mos presiza dalan. Ba transporte terestre, roda rua, roda haat ka liu atu halai ba-mai presiza dalan nebe ita bolu liuron (estrada). Bero kiik sira tasi-ninin to’o ro-ahi boot sira iha tasi-klaran mos iha sira nia dalan nebe. Nune’e mos aviaun sira be semo, iha sira nia dalan-rasik nebe iha lian portugez ita bolu ‘linhas aéreas.’

Liafuan ‘dalan’ nudar tatudu, aplika mos iha mundu siensia nian. Matenek-na’in (cientista) sira presiza dalan atu hetan no inventa teoria. Estadu ka faze hahuu (inicial) husi invensaun teoria ka deskobrimentu oioin mak bilaan. Iha lian indonezia, dehan ‘bingung.’ Bilaan iha ne’e la’os fak, maibe bilaan ida nebe nakonu ho hakarak atu litik. Iha prosesu litik ne’e mak matenek-na’in sira define nudar faze ‘hipotetik’ ka ‘hipotesa.’ Atu tulun identifika no klasifika prosesu litik hodi konkretiza validade ninia hanoin, nebe nia seidauk hatene los ka la los, matenek na’in sira hamosu buat nebe sira define nudar ‘método (port.).’ Orijem hosi lian Gregu, METHODOS nebe kombina hosi liafuan rua META ho HODOS. META katak objetivu, HODOS katak dalan. Método, katak dalan atu to ba rohan, atu hetan hanoin loloos ba lian-litik sira.

Klo’ot. La presiza uza metodu atu deskreve magarti hosi liafuan ‘klo’ot.’ Liafuan klo’ot halo ha’u hanoin kona fábula (istoria balada nian) nebe ha’u hetan, bainhira eskola iha tempu portugez. Istoria konaba busa-fuik (raposa) ho manu-bee (cegonha). Atu konkretiza sira nia habelun-malu, sira traktir-malu han. Busa fuik tau hahan iha bikan belar-balgana belar boot ida, manu-been la konsege han, tanba nia ibun meik no klo’ot liu atu bit hahan naklekar iha bikan-laran. Manu-bee fo han busa-fuik ho garrafaun boot ida, maski na’an-fresku barak iha garrafaun laran halo busa-fuik nia kabeen nafurin, maibe busa-fuik labele tata kona na’an musan ida, tanba garrafaun nia ibun klo’ot liu.

Hanesan mos lian Gregu, lian Tetun mos kaan atu kombina lian rua ka tolu atu define buat ida. Hosi Biblia ka katesismu Doutrina-badak, ita rona bebeik liafuan RAHUN-DI’AK. Bainhira ita temi keta-ketak, liafuan rua ne’e iha ninia magarti rasik. Maibe, bainhira ita kombina, nia magarti refere ba buat seluk nebe la iha relasaun ho buat sira nebe liafuan sira ne’e ida-idak hatudu. Hanesan ita hotu hatene katak liafuan RAHUN-DI’AK signifika “bem-aventurados” ka iha lian indonezia ita dehan “berbahagialah.”

Bainhira ita kombina liafuan ‘dalan’ ho liafuan ‘klo’ot’ ita hetan liafuan “DALAN-KLO’OT.”    

Karik ita aplika dalan-klo’ot ba sasan fiziku sira hanesan marka hodi tudu ema ka balada nia hakat, meiu-transporte sira nia movimentu (halai ba-mai), la susar ba ita atu determina ita nia hahalok ka lala’o. Iha dalan klo’ot, ita tenki ses-malu bainhira la’o hasoru-malu. Iha dadolin Timor nian katuas-ferik sira sani ba ita ‘iha laletek ita hakletek, iha tetuk ita hatetek; iha kabubu ita nadodon, ita natar ita nabar (hanesan malus moris iha ai-diik ka ai-lele nia lolon).’

Iha dalan-klo’ot ona mak ita la’o ‘kakareka’ ka les-kelen fali, ita bele halo halo ema seluk nebe atu liu ne’e hanoin-klo’ot. Bainhira ema seluk ne’e nia hanoin-klo’ot, ita nia moris mos bele klo’ot liu tiha dalan nia klo’ot. Iha dalan luan, ita hakarak la’o ‘kakareka’ to’o kalsa-kidun nakles (to’o anin hu tama) tiha mos ‘no problem.’ Ka balun hakarak la’o fo-sorin de’it, maski dalan luan hela, hanesan klosan balun nebe foin sai hosi gym, hatudu liman-kabun, loke-peitu tama portaun luan boot fo-sorin ho hanoin katak nia isin boot liu tiha portaun nia luan mos ‘tidak apa-apa.”

Maluk sira nebe lori kareta, bainhira liu iha ponte tuan Laleia, bele entende ona hahalok sa ida mak tenki halo bainhira ita haree kareta seluk mai hosi ponte sorin. Se mak to’o uluk iha ponte-rohan, nia mak iha prioridade tama uluk. Iha situasaun balun, bainhira distansia dook, uza posto komunikasaun. Sira nebe lori kareta iha tinan 1960 ba kraik, mos bele ke’e fali sira nia memoria bainhira lori kareta atu liu Subaun-boot no Karimbala.

“Dalan-klo’ot” baibain ita uza mos nudar lian ‘kiasan’ ho sentidu pejorativu (negatif). Iha konkorensia, desportiva ka politika, parte ida-idak baibain soe-lia (piada) “ita dalan-klo’ot hotu”. Espresaun loloos ne’e atu dehan “o susar atu manan ha’u, maski ha’u mos susar atu manan o”, tanba sasidi (obstáculo) no sasadik (desafio) nebe konkorente sira impoin ba malu nia todan hanesan. Se aplika iha kontekstu istoria busa-fuik ho manu-bee karik dehan “ha’u la hetan hahan tan ha’u nia ibun-klo’ot liu, o mos la hetan tanba garrafaun nia ibun klo’ot liu.”

Iha moris lorloron, ema baibain mos personifika sira nia kbiit atu buka moris ho situasaun bainhira la’o iha dalan-klo’ot. Liuliu bainhira mosu difikuldade. Ses ba sorin la di’ak. Ba oin xoke, hakiduk mos kona. 

Situasaun politika iha ita nia rain bele sai lalenok furak atu fihir. Ho hanoin-klo’ot, ita haree katak independensia nebe ita proklama iha 28 Novembru 1975 no restaura iha 20 Maiu 2002, hanesan tiha na’an-fresku iha garrafaun laran ka sai tiha hahan nebe iha bikan-balgana luan boot ne’e. Povo maubere sai tiha busa-fuik, nakfilak tiha ba manu-bee. Ibun meik no klo’ot liu atu bit hahan iha bikan balgana laran. Garrafaun nia ibun klo’ot liu ba povu nia ibun atu tata na’an fresku iha garrafaun laran. Aswa’in povo maubere sira nebe uluk hanoin-luan no neon-na’in, nakfilak tiha ba politik-wa’in “neon-klo’ot” ho sira nia politika “dalan-klo’ot.” Sira mos nakfilak-an tiha ba busa-fuik no manu-bee: hanoin-luan, maibe neon-klo’ot. Hanoin-luan atu serbi, maibe neon-klo’ot atu tane.

Partidu politiku sira kaan la’o kakareka (les-kelen) iha dalan-klo’ot hodi hadau tiha povu nia dalan ba moris di’ak. Politik dalan-ko’ot ho hanoin-klo’ot serve de’it atu baku-fila meza no kadeira iha uma-fukun, no haklo’ot de’it povu nia dalan hosi tetuk terus nian ba laletek moris-di’ak nian. 

Matenek sira ko’alia naruk konaba ba buat barak hanesan bidon-mamuk nebe lian boot, halo ema barak haklalak, maibe loron ba loron lian hanesan de’it no nune’e hela de’it. Neon-na’in sira hakerek naba-naba to’o liman-fuan matek, maibe la hamoris esperansa pedasuk ida iha povu nia halerik-laran. Iha sira nia hakerek povu haree ho malorek sira nia laran makerek. Referensia filozofia no dogma relijiaun sai de’it masker atu falun ita nia hahalok vingativu hasoru sira seluk nebe ita la gosta.

Afinal, ita busa-fuik hotu. Ita hotu mak manu-bee. Hanoin luan, neon klo’ot! Politika dalan-klo’ot, produz de’it ema neon-klo’ot.

Autor

  • Skylight

    Dala ida tan, mai ita ko’alia konaba kombina liafuan. Liafuan ‘skylight’ ne’e kombinasaun liafuan rua: ‘sky’ ne’ebe ni...

    Jul 06, 2020

  • Dalan-Klo’ot

    Dalan. Ema hotu hatene sa ida mak ‘dalan.’ Fizikamente, nia nudar marka hodi tudu ita nia hakat. Atu ba natar, ba toos, ba merka...

    Jun 20, 2020