Poezia Husi Kuba*

Poezia Husi Kuba*

Olá Doben, di’ak lae?

Horikalan ha’u toba la dukur. Dadeer tuku rua, ha’u hakfodak no toba fali la dukur ona. Aban Sábadu. Entaun ha’u koko hakerek halimar poezia ida tuir-mai ne’e:

Husi foho
Siera Maestra tutun
ha’u rona knananuk
umanismu revolusionariu ida
hananu husi José Martí
hatutan liu husi
Fidel Castro no Che Guevara

Iha Ramelau no Matebian tutun
Xavier no Nicolau Lobato
rona tutan knananuk
furak ne’e
Che hakilar ‘El Hombre Nuevo’
Lobato hatutan ‘O Novo Homen’ – ‘Emar Foun’
ba Loriku Asuwa'in tomak

Iha biban oras ne’e
Xavier no Nicolau Lobato foun sira
sei bele hatutan tan
knananuk revolusionariu ne’e ka lae?
----------------


Aiih, ne’e poezia ida hodi hamaluk ha’u dadeer ne’e, hodi hein loro-matan mosu iha oras balun tan. Horiseik loraik ha’u lao halimar iha Plaza de la Revolucíon ho kolega balun. Ami bá haree estatua husi Libertador Revolusionario no Poeta Jóse Martí. Martí mak hahu kontra kolonialismu Español iha Kuba. Interesante tebes haree ema barak sei mai vizita nafatin fatin ne’e. Martí-nia lia menon tinan atus ba kotuk sei moris nafatin iha Kubano sira nia fuan no kakutak. Ha’u gosta saida mak nia hateten kona-ba edukasaun, “La educacion comu la luz del sol, puede y debe llegar a todos”. Tanba Martí fiar katak liu edukasaun mak ita ema bele ‘livre’.


Maibé doben Gil, ó akompaña El-Comandate Fidel Castro-nia mate ka lae? Iha Kuba, nasaun tomak hanesan paralizadu tiha. Mane klosan no feto klosan, ferik katuas, estudante sira hotu, laiha ida mak la tanis. Iha ami-nia koléziu mós hanesan de’it. Koalia loloos ne’e, Kuba nakonu ho povu tomak-nia matan-been. Ha’u admira tebes ho akontesimentu ne’e. Ó kompara tok ho ditador Suharto ne’ebé ukun Indonezia tinan 30 resin no invade ita nia rai. Hariku nia-an, nia-família no nia-kroni sira de’it. Ha’u la haree ema Indonezia tanis hanesan povu Kubano tanis hodi fó omenájen ba Castro.


Olá doben.


Ksolok tebes simu ó-nia email semana kotuk. Ksolok liu haree ó-nia foto ho imi-nia ministru iha ponte luxu no estrada luan, jalan toll ne’e. Loos, hanesan ó hateten ponte no estrada sira ne’e luxu duni. Maibé, wainhira ha’u hatudu foto sira ne’e ba Allende, ha’u-nia amiga Kubana di’ak ida, nia hakfodak no hato’o lian-litik, pergunta lubuk ida halo ha’u ulun moras no moe utuan.


“Mi hermana, ¿por qué no hay autos en el puente de lujo y en la gran autopista? - Belun, tansa laiha kareta ruma halai iha ponte luxu no estrata autopista/jalan toll ne’e?”, Allende losu matan hahu litik ha’u.


Ho moe utuan ha’u hatan ba nia katak, “ne’e ami-nia mehi no planu ba futuru”.


Nia lakoi nonook, maibé litik nafatin ha’u.


“¿Tu futuro? Imi-nia futuru? Maibé, miga. Fulan kotuk iha ó-nia apresentasaun kona-ba Timor-Leste, ó hatudu mai ami difikuldade oinoin ne’ebé imi enfrenta oras ne’e iha setór saúde no edukasaun. Ó hateten dehan dotór sei menus liu, taxa labarik moris mai mate liu sei aas nafatin, aimoruk menus iha ospitál sira. Nune’e mós iha setór edukasaun. Ó-nia aprezentasaun hatudu malorek kona-ba menus fasilidade iha eskola sira. Kualidade profesor sira sei menus liu. Ha’u hanoin katak asuntu saúde no edukasaun no aihan mak imi-nia prioridade hodi bele prepara futuru ne’ebé di’ak. La’ós estrada boot ka ponte luxu hanesan iha foto ne’e, ka airoportu luxu sira.”


Aiih, doben. Deskulpa de’it, ha’u-nia amiga ida ne’e kuandu ita koalia ona asuntu ideolozia no pulítika dezenvolvimentu, entaun nia koalia la para. Dalaruma nia reta ita ho pergunta sira halo ita sai bilan.


Maibé doben, konversa liu tiha ho Allende, ha’u hanoin katak nia-pergunta no komentariu sira ne’e iha fundamentu. Semana kotuk ha’u mós haree ita nia-Nai Ulun ida, nia mós tau foto ponte luxu ne’e. Nia hateten dehan ponte ne’e bele sai hanesan obra arte ida iha Lisboa ka Sydney ka Paris. Ha’u hakfodak utuan ho lia-funfunan sira ne’e. Loosduni, ita persiza sasan sira ho kualidade hanesan estrada no projetu selseluk tan. Ita lakoi projetu ‘taka kuak loke kuak’. Maibé, ita nia nasaun persiza ponte luxu hanesan ne’e ka? Kareta hira mak liu iha ponte luxu ne’e. Lorloron ha’u haree ponte ne’e ema mak ba hasai foto iha ne’ebá. Aat liu mak la dook husi ponte ne’e, eskola sira sabraut loos. Ospitál sira mós sabraut loos. Bee moos ba povu sira mós laiha. Ha’u sei ksolok liu se karik Nai Ulun ne’e dehan eskola sekundariu ka ospitál ida iha Timor mak nia kualidade laiha diferensa ho eskola ka ospital ida iha Lisboa ka Sydney ka Paris. Nune’e mós, ita persiza duni estrada. Maibé estrada luan, jalan toll ne’e kareta hira mak atu liu iha biban ne’e. Ha’u hanoin fali Apá-nia lia-menon mai ha’u: ‘osan utuan ne’ebé mak hau iha ne’e, ha’u prefere gasta ba imi nia eskola, duke halo uma luxu ida. Ka sosa kareta ida oras ne’e. Uma simples, maibé moos no saudável naton ona mai ita. Kuandu imi eskola matenek, imi sei bele hadi’a uma ne’e di’ak liutan iha futuru.”


Olá Doben, deskulpa. Ha’u koalia barak liu fali kona-ba pulitik. Karik tanba ha’u nia kakutak manas utuan haree situasaun pulitik rai laran husi dook.


Ha’u hanoin katak ita-nia nasaun la persiza projetu boboot no luxu. Oras ne’e urjenti liu mai ita atu prepara labarik sira ho kakutak mak ‘luxu’, katak sira iha matenek di’ak hodi enfrenta sira-nia moris, mós hodi bele dezenvolve ita-nia rai. Se sira-nia kakutak ‘luxu’ alias matenek, estrada ka ponte aat aban bainrua, sira sei bele hadi’a. Maibé se sira-nia kakutak mak ‘intupidu’ alias beik, entaun aban bainrua ponte luxu sira ne’e aat, mak sira sei labele hadi’a. Ita tenke tane liman nafatin ba ema seluk.


Aiih, karik doben ladun aseita ho ha’u nia opiniaun sira, ha’u husu deskulpa de’it. Keta hola ba lia eeh.


Oinsa ho ita nia planu ba kazamentu? Sei nafatin hanesan ó hateten iha ó nia email semana kotuk ka? Karik fulan Jullu tinan oin ha’u bele to’o ona Dili.


Mi querido amor,


Horiseik ha’u mós lao halimar ba haree Estatua Che Guevara. Ha’u haree manu pombu rua semo ba mai. Tuur iha Che Guevara nia boiña leten. Sira rua rei-malu ho laran ksolok tebes. Sira rua la fadigadu ho ema barak hateke hela sira-nia zeitu. Turista sira hasai Che hamutuk ho sira rua-nia foto. Kamera lubuk ida loos mak se ba sira nain rua. Parese sira rua-nia foto nakonu iha FB, instangram hamutuk ho El-Comandante Che Guevara-nia oin revolusionariu no bonito ne’e. Ema hasai foto barak liutan, sira nain rua maiña malu liutan de’it. Sira rua tata-malu, hakuak malu, hanesan mundu ne’e sira nain rua-nian de’it ona. Hanesan loron-aban laiha ona. Sira rua mós halo an hanesan sira rua simu hela mensajen kona-ba domin no solidariedade umana husi Che Guevara. Parese sira rua iha misaun boot ida atu hatutan mensajen ne’e ba pombu maluk seluk. Karik Komandante Che hateten ba sira rua katak ita ema nia kakutak nakonu liu ona ho hanoin individualismu, kompetisaun no ambisaun ba poder no funu. Aiiih, ne’e pombu nia zeitu de’it sa, doben.


Doben sei hanoin ka lae momentu ita lao pasiar ba Dare. Alin mane oan ida hatais kamizola Che Guevara. Momentu ha’u husu nia kona-ba Che, nia bilan, la hatene sé mak Che Guevara. Semana oin mak ha’u sei konta istória utuan kona-ba Che.


Olá Doben. Hau sinti intimida utuan kona-ba planu festa kazamentu ne’e. Tanba sa mak ita persiza konvida bainaka kuaze ema 1000? Gastu boot tebes ba planu festa ne’e. Ha’u apresia doben dehan doben mak sei hasai despeza boot liu ba festa ne’e. Ha’u kumpriende doben nia pozisaun hanesan Diretor Jerál iha ministeriu ne’e iha salariu permanente. Maibé, se ita halo festa boot hanesan ne’e ita gasta osan barak tebes, no ha’u tauk doben nia vensimentu mós la to’o. Banhira to’o Dili, hau mós foin atu servisu. Apá nia vensimentu mós naton de’it. Doben hateten dehan doben nia belun di’ak Pak Joko sei tulun buat balun ba ita nia festa kazamentu. Pak Joko mós atu fasilita ita nia fulan-banibeen, lua de mel, iha Bali?


Ha’u sinti ladun konfortavel ba planu ne’e. Karik Pak Joko ema laran di’ak, maibé deskulpa de’it tan ha’u la kuñese pak Joko. Pak Joko ne’e sé ida? Ha’u prefere ita halo festa naton de’it. Família bele tau osan hamutuk no ita la persiza konvida ema barak hanesan ne’e. Deskulpa se hanoin sira ne’e ladun monu ba doben nia laran. Maibé, iha ha’u nia familia rasik, ha’u sei persiza tulun ha’u nia alin feto ne’ebé mak foin atu tama universidade.


Aiiihh, te echo mucho de menos mi amor. Ha’u hakarak lao halimar ba Raihenek Mutin sábadu dadeer hanesan baibain. Tuur haree labarik sira halimar ho rai henek halo kastelu no uma-lulik. Haree sira nani no rega malu ho tasi-been. Haree sira haksoit tapa. Haree sira tebe bola. Hemu nuu been fresku. Haree alin aileba sira fa’an sira nia ai-fuan. Haree katuas fa’an tais lao ba mai tasi ibun, koko konvense malae sira hodi sosa nia tais. Aiiih, kleur liu ona doben. Ha’u hakarak fila ba ó nia sorin ona. Tuur hateke loro-matan sae neineik, hodi simu nia bensa atu ita nia domin bele buras liutan. Ouuh, Raihenek Mutin, fatin homan domin ba ema nurak sira. Loraik, haree loron monu neineik. Molok subar an iha tasi-ikun, loron hatudu nia kór osan-mean nabilan, kór kinur no mutin iha kalohan leet. Loron tatoli lia menon atu ita fila ba uma hodi haburas liutan ita nia domin iha hakmatek laran.


Haree labaraik sira halai ba mai tasi ibun, balun isin diak. Balun krekas maran hanesan aihan ho nutrisaun di’ak ladun to’o ba sira. Situasaun ne’e fó hanoin fali ha’u momentu ami foin to’o iha Kuba. Señora sira ba simu ami iha airoportu. Sira hakfodak haree ami barak nia isin krekas maran loos. Sira balun ho kómiku husu mai ami, ‘imi han saida iha ne’eba? Sira hatudu tebes domin mai ami hotu. Sira haree ami diak loos. Iha ne’e aihan ho nutrisaun di’ak, maski nia gostu diferente ho ita nia hahan iha ne’eba. Ai-manas ho derok-budu mak ita buka la hetan, tan Kubano sira la gosta han ai-manas. Ami han fore-keli barak. Maibé buat importante ida iha Kuba mak labarik sira maski iha suku izoladu sira ne’ebé sira nia inan-aman kaer to’os de’it, maibé isin no saúde en jerál di’ak tebes. Ita kuaze ladun haree labarik isin krekas tan hahan la iha.


Sira tau prioridade aas tebes ba sistema edukasaun no saúde. Ema nia moris tenke saudável. Ne’e sira nia prinsipiu. Loos katak iha aspetu balun, hanesan liberdade individual no pulítika sei iha restrisaun. Konserteza, Kuba la’ós ‘lalehan’. Tan laiha duni ‘lalehan universal’ iha mundu ne’e, maski ita ema bele kria rasik ‘lalehan’ iha ita ida-idak nia moris laran. Solidariedade umana aas tebes iha rai-oan ida ne’e. Kubanu sira hatudu duni sira nia solidariedade umana ba mundu tomak liu husi halekar sira nia médiku sira ba nasaun barak, inklui iha ita nia rai doben. Mós iha Kuba rasik. Entaun iha ne’e, ami la’ós de’it aprende no prátika kona-ba aimoruk kuímika sira hodi kura moras, maibé ami mós aprende no prátika ‘aimoruk ba solidariedade umana’. Tanba oras ne’e ‘solidariedade umana’ hetan ataka maka'as husi virus kapitalismu, rasísmu no zenofobia iha mundu tomak. Ita nia inan-aman sira sempre konta, kuandu uluk sira oho manu-oan ida ka fahi ida, sira sempre fó netik na’an rohan oan ruma ba viziñu. Nune’e mós viziñu sei halo hanesan mai ita. Ha’u hanoin ita nia lisan ida ne’e mihis dadaun ona.


Hola mi amor,


Oras ne’e, ami tama ona ba loron 30 fulan Agostu. Loron istóriku tebes mai ita. Iha loron ne’e, tinan hira ba kotuk, Timor-oan sira ho aten brani, liman kaer metin pregu hodi tu'u ba Ukun Rasik An. Orsida kalan ha’u sei sunu lilin oan ida, hodi hanoin hikas ha’u nia Maun doben, Aníku. Militar sira kaer Maun Aníku depois de kampaña iha Kampu Futebol Liquiça molok referendum. Apá hateten katak sira buka kedas Maun Aníku, maibé la hetan. Amu Pádre ba husu komandan Kodim ho milisi Besi Merah Putih sira, maibé sira nega katak sira la hatene buat ida. Amá ba tanis iha Dandim ho Besi Merah Putih nia boot, maibé tentara ida mai dudu ses Amá. To’o biban ne’e ami seidauk hatene nafatin Maun Aníku nia isin-lolon iha ne’ebé. Apá-Kiik mós mate iha Igreja Liquiça fulan Abril, wainhira milisia ho Tentara sira ataka Igreja ne’e. Momentu susar ida mai ha’u mesak iha Havana biban ne’e hodi hanoin fali Maun Aníku ho Apá Kiik. La hatene sé mak bele husu ba Jeneral Indonezia sira hodi hatudu netik fatin sira soe ka hakoi maun Aníku ho tan materestu sira seluk.


Aiih…doben deskulpa, hau matan dukur loos ona, karik ha’u bele koko toba utuan molok loro-matan mosu mai. Se mak hatene, keta loron-matan dadeer mosu mai, sei fó netik naroman oan ida mai ha’u kona-ba Maun Aníku nia ílas be lakon ne’e?


Atu taka, ha’u hakarak dedika tan poezia ida ne’e ba doben.


Liu husi
anin huu be malirin
ha’u tatoli lian domin ba ó
kalan rona teki lian
hanesan hananu domin ida
dere ha’u nia fuan
hodi temi ó nia naran
haree labadain homan metin
sira nia fatin
hanesan ita rua
homan nafatin domin ne’e
haburas hanesan
ai-kasi funan buras matak
iha foho lolon
no tasi-ibun.


Ha’u hein doben nia hatan. Abrazo y besos para ti.

Lita,
Havana, Kuba, 30 Agostu, 2017.


Istoria-badak ida ne'e ha'u hakerek loloos iha 2007, maibé rai kleur no tinan kotuk mak hau foin hadi'a loloos ho informasaun no imajinasaun foun seluk.

*Bele sani mós versaun Español iha ha’u nia FB, ne’ebé tradus husi Irman Zelia Soares de Oliveira, iha Lima, Peru.

Autor

  • Poezia Husi Kuba*

    Olá Doben, di’ak lae?

    Horikalan ha’u toba la dukur. Dadeer tuku rua, ha’u hakfodak no toba fali la dukur ona. Aban S...

    Jul 06, 2020